BENVIDOS

Onte chegaron ao Insti os alumnos alemáns do INTERCAMBIO. Son rapaces e rapazas da idade dos nosos alumnos de 4º da ESO. De feito serán algúns alumnos de 4º os que farán de anfitrións e os aloxarán nas súas casas. Logo tocaralles a eles devolverlles a visita e pasar uns días na súa casa, na cidade de Nuremberg.

Non é a primeira vez que os nosos alumnos fan intercambio con alumnos desta cidade alemá. A profesora de inglés Hilda Fraga e a profesora de ed. física Teresa Amido levan xa uns anos organizando estas viaxes coa finalidade de animar aos alumnos a mellorar na práctica do inglés, idioma que utilizan para comunicarse cos alumnos estranxeiros que nos visitan.

O Escribano palustre

O escribano palustre foi nomeado pola Sociedade Española de Ornitoloxía, ave do ano 2009. O nomeamento pretende dar a coñecer a situación de perigo de extinción na que se atopa este paxariño e artellar medidas de conservación para que non desapareza.

A súa poboación non supera as catrocentas parellas, e está moi ameazada pola perda do seu hábitat a causa dos cambios nas prácticas agrícolas e a mala xestión das zonas húmidas.
Se queres saber máis sobre paxaros en xeral e sobre este en particular clica AQUÍ ou AQUÍ ou AQUÍ.

E aproveitando que xa está aquí a primavera, invitámoste a participar na campaña on-line de observación de aves migratorias de springalive AXÚDANOS A DESCUBRIR A PRIMAVERA.

Dia Mundial da Auga

Como cada ano desde que a ONU declarou o 22 de marzo Día Mundial da Auga, o mundo aproveita este día para reflexionar sobre un tema que foi sempre motivo de conflito entre os seres humanos. E precisamente este ano está dedicado ás augas compartidas.
Sen auga non se pode vivir e desgrazadamente é un ben cada vez máis escaso, por iso nos países pobres do continente africano morren cada día deshidratadas miles de persoas.
O cambio climático e o crecemento demográfico das zonas do mundo máis deprimidas está a ocasionar que cada vez haxa menos auga potable para todos e que a calidade da mesma sexa cada vez peor.
Aquí vos deixamos unhas cantas actividades para que tamén vós reflexionedes sobre o tema:

Auga e desenvolvemento
Caderno da Auga
A auga no mundo
Día Mundial da Auga