XII SC/A SAÚDE: ACTIVIDADE ECOSALUDABLE - SENDERISMO, PASEO POLO MANDEO

 Hoxe celebrouse unha das últimas actividades dentro da Semana Cultural. Unha actividade ecosaludable, una ruta de senderismo polo río Mandeo con grupo de 4ºESO. Esta actividade foi como premio á mellor decoración de aula no Nadal.

Acompañaron as profesoras: Inma Mato, Mar Seara e Isabel Viñuela.

ROTEIRO POLA CIDADE CON XURXO SOUTO

O escritor, cantante, actor e profesor coruñés Xurxo Souto acompañou ao noso alumnado dos tres grupos de 1ºBAC a un roteiro cultural pola cidade vella nestes dous últimos días.

Precisamente Xurxo estivo facendo unha sustitución como profesor de latín no noso centro estes días.

ROTEIRO UXÍO NOVONEYRA

Premer na imaxe para ver o roteiro con detalle

Homenaxear a Uxío Noveneyra é homenaxear ao Courel porque non se entenderían o un sen o outro. Esta é a razón pola que ETNOGA coa colaboración da familia de Uxío Novoneyra trazou un roteiro xeográfico, etnográfico, histórico e biográfico-literario polas terras do Courel.

Se non coñecedes esta zona de Galicia, a primavera é un momento excelente para achegarse alí, porque ademais do dito anteriormente, é unha zona cunha riqueza florística e faunística extraordinaria.

E aos que vos guste facer sendeirismo non esquezades percorrer a Devesa de Rogueira.

Tedes decidido o que ides facer esta fin de semana? Pois daquela aproveitade a nosa suxestión.

UNHA FIN DE SEMANA MOI CULTURAL

Created by Crazyprofile.com
Esta fin de semana celébranse na Coruña moitísimas actividades culturais: hai para todos os gustos e todas as idades, por iso dende a biblioteca pensamos en facervos unha selección das que consideramos máis interesantes:

As actas escuras de Roberto Vidal Bolaño, representada polo Centro Dramático Galego dirixido por Xulio Lago, o venres 19 e o sábado 20 no Teatro Rosalía de Castro. É unha historia ambientada na Compostela da segunda metade do século XIX, que ten un argumento da máxima actualidade por celebrarse un ano xacobeo: parte da hipótese de que os restos que se veneran na catedral de Santiago poden non ser do Apóstolo.

Roteiro "Rosalía na Coruña", de arredor dunha hora e cuarto de duración, que comezará ás 12 da mañá do domingo día 21 na Rúa do Príncipe nº 3 (esquina Capitanía) na cidade vella, e percorrerá os lugares vinculados á vida da autora na nosa cidade, nos que se lerán os seus poemas. Esta actividade celébrase con motivo do Día Internacional da Poesía.

Orquesta Sinfónica de Galicia no Palacio da Ópera o venres 19, ás 20:30, dirixida por Victor Pablo Pérez, que interpretará obras de Chaikovski e Scriabin.

Banda Municipal de Música tamén no Palacio da Ópera o domingo 21, ás 12:15, dirixida por Marcel van Bree, que interpretarán obras de A. Reed, Nani García, G. Gershwin e F. Sinatra.

Tedes tamén varias exposicións interesantes:

Relacionadas co mundo da muller: Mulleres, espello de culturas no KiosKo Alfonso, Visibilidade no Pazo Municipal e Mulleres por Mulleres na Casa da Cultura "Salvador de Madariaga".

E ademais:

Atapuerca e a evolución humana no Palexco.

Europa foi o camiño na carpa instalada nos Xardíns de Méndez Núñez.

COMO PODEDES VER, TEDES ONDE ELIXIR. APROVEITADE A LONGA FIN DE SEMANA.

CINCUENTENARIO DA MORTE DE CABANILLAS

Di Luís Rei, o biógrafo que publicou este ano a extraordinaria biografía de Cabanillas titulada Ramón Cabanillas. Crónica de desterros e saudades que "Ás oito da mañá do 9 de novembro de 1959" morría o poeta, e que a prensa da época se fixo eco da noticia, mesmo cun programa especial en Radio Vigo. Pasaron xa cincuenta anos! Foi soterrado no cemiterio de Fefiñáns, onde tamén descansaba a súa dona Eudosia. Pero nin morto puido descansar Cabanillas na terra cambadesa porque, como tamén lembra Luís Rei, o 12 de agosto de 1967 os seus restos foron trasladados a San Domingos de Bonaval, en Santiago de Compostela, ao lado dos de Rosalía e Asorey, onde tamén descansan hoxe Castelao e Novoneyra. Alí permanecen pechadas as cinzas do "poeta da raza", mais a súa voz segue a vibrar no ar cada vez que recitamos os seus versos, por veces incendiarios, por veces cheos de sensualidade ou tenrura, por veces amosando a tristura da despedida, como estes que atopamos no seu libro Samos:

"No roteiro que vai caír na Morte

a Vida recadou nova xornada.

Diante, a luz teologal, inextinguibre,

detrás, poeira, tebras, cinza... nada.
"

Con motivo do cincuentenario o Concello de Cambados proclamou o 2009 Ano Cabanillas e levou a cabo multitude de actividades, entre elas a inauguración dun Roteiro poético ou a exposición Os artistas de Cabanillas. Como despedida do Ano Cabanillas a RAG celebrará un acto solemne de homenaxe ao poeta o próximo día 12 de novembro en Cambados.