FIN DE SEMANA DE PREMIOS

Onte, 10 de abril, a Federación de Libreiros de Galicia entregou en Sarria os galardóns da XIX Edición dos Premios Irmandade do Libro que recaeron na poeta Luz Pozo como autora distinguida, A praia dos afogados de Domingo Villar como mellor libro do ano, a Asociación Cultural Monte Branco de Ponteceso na categoría de Institucións, a Libraría Porta da Vila de Viveiro na categoría de librarías, a colección Contemporánea de Rinoceronte Editora na modalidade de obra editorial, o CEIP San Martiño de Salcedo (Pontevedra) na modalidade de Centros de Ensino e a asociación Espazo Lectura na de Fomento da Lectura.

NORABOA A TODOS E TODAS!

2500 ANOS DA BATALLA DE MARATÓN

Este ano os gregos celebran os 2500 anos da batalla de Maratón que puxo fin ás primeiras Guerras Médicas, unha serie de enfrontamentos entre gregos e persas. Nesta batalla, celebrada o ano 490 a.C. na chaira de Maratón, situada aproximadamente a corenta e dous quilómetros de Atenas, conta a lenda que os atenienses, temerosos de non poder vencer aos seus inimigos, mandaron a un soldado chamado Filipides a pedir axuda aos espartanos. Filipides cumpre o seu encargo, e despois de percorrer 240 quilómetros de ida e 240 quilómetros de volta en dous días e dúas noites, chega a Maratón e continúa loitando ata que vencen aos persas e de novo é enviado como mensaxeiro ata Atenas para anunciar a vitoria. Malia ser un atleta, o esforzo realizado por Filípides foi tan grande que tan só lle deu tempo a dicir: "nenikekamen" e caeu morto.

Na súa memoria instituíuse unha proba atlética de resistencia denominada maratón na que os corredores teñen que percorrer tamén 42 quilómetros ata chegar á meta.

O TEATRO DA FIN DE SEMANA

Sarabela Teatro volve a representar no teatro Rosalía de Castro da Coruña a súa adaptación da novela A Esmorga de Blanco Amor. Non perdades a oportunidade de vela porque merece a pena.

Lembrades que o ano pasado celebramos os 50 anos d'A Esmorga ? Pois con este motivo publicouse en Ourense un libro con diferentes textos e actividades relacionadas coa Esmorga e con outros aspectos da obra de Blanco Amor titulado:

EBA 5.0 - O universo de Blanco Amor 50 anos

Nel tedes banda deseñada, xogo de rol, ensaio, música, títeres e deseño gráfico