Cara o 25N

Pensando xa na conmemoración do 25N, o noso expositor da biblioteca énchese de lecturas onde a muller é a protagonista. Desde Persépolis de Marjane Satrapi á Volta ao mundo en 72 días de Nellie Bly, ou a novela gráfica Sufragista, Quiéreme bien o La mujer rebelde, son algunhas das propostas de lectura, entre outras moitas, para este mes.

Sabías que... pola Resolución 54/134 de 17 de decembro de 1999, da Asemblea Xeral da ONU, o 25 de novembro foi designado Día Internacional da eliminación da violencia contra a muller?

Ademais, estes días podedes ver na cortiza do corredor da biblioteca algúns dos carteis máis coñecidos nos últimos anos sobre o 25N, Día Internacional da eliminación da violencia contra a muller. Son carteis que foron protagonistas das campañas pola igualdade desde diferentes comunidades Autónomas.

Novos clubs de lectura

Esta semana desenvolvéronse as primeiras sesións de reunións de dous novos clubs. Por un lado, o club de banda deseñada en galego coordinado pola profesora Begoña Pérez e, por outro lado o club de novela negra dirixido a pais, nais e persoal do centro coordinado pola profesora Isabel González.

No club de banda deseñada elixíronse algunhas das lecturas a realizar e no club Negrísima abordouse o libro A muller de verde do islandés Arnaldur Indridasson. No libro combínanse unha triste historia do pasado que se vai fiando a partir duns restos atopados no barrio do Milenario en Reickiavic e a historia do presente, protagonizada polo inspector Erlendur.

Na reunión achegámonos á un lugar afastado, Islandia, á súa paisaxe abafante, a súa sociedade, así como aos trazos da idiosincrasia deste país e as súas xentes.

Estreamos nova web, bibliodieste.com

Cremos nunha biblioteca activa e creativa que sexa a guía dun gran feixe de actividades e proxectos no noso centro. Na nova web podedes atopar mes a mes todo isto e máis.

As nosas liñas prioritarias son: promover a integración e a inclusión, fomentar hábitos de lectura nos máis novos, abrir as actividades ás familias e a todo o persoal do centro, motivar ao alumnado, e lograr, ante todo, unha convivencia positiva nun lugar de encontro e de diálogo. A biblioteca convértese así nun hiperespazo onde teñen cabida o coñecemento, os xogos e a liberdade creativa.

• Acceso á nova web

Contos terroríficos na biblioteca

De E. A. Poe a Lovecraft, pasando por G. A. Bécquer ou H. Quiroga, entre outros autores, mergulláronnos no terror neste Samaín.

O corazón delator, O barril de amontillado, O monte das ánimas e El almohadón de plumas, son algúns dos relatos elixidos para ler nestes días na biblioteca do IES Rafael Dieste.

Alumnado e profesorado introducíronnos neste xénero de terror.

Suspense, horror cósmico, novela gótica... un pouco de medo para o Samaín.

Seguimos dous días máis durante os recreos en streaming.

Samaín 2024: Contos terroríficos

Por fin chega o Samaín! 

Gustounos tanto a actividade do Samaín pasado que repetimos os contos de terror na biblioteca. 

Podedes vir de público ou animarvos a contar unha historia de medo… Todo está preparado para emitir en streaming nun ambiente verdadeiramente terrorífico…

Alí estaremos con máis sorpresas nos recreos do martes 29 e do mércores 30 de outubro. Á volta da ponte, tamén nos recreos, os días 5 e  6 de novembro, seguiremos con contos de medo.

24 de outubro: Día das bibliotecas

Como celebración do Día das Bibliotecas, varios grupos de ESO, enfrontáronse a un trepidante xogo de pistas para atopar os marcapáxinas esquecidos.

Por que deixamos abandonados os marcapáxinas? Igual porque o libro parécenos aburrido, ou esa páxina onde quedou o marcador asustounos ou non nos gustou nada…

O caso é que nos libros da nosa biblioteca hai unha morea de marcadores esquecidos e que están desexando saír desa páxina... xa!

Debemos liberalos do seu cativerio… Para iso seguimos unha serie de pistas para atopalos. A través dunha serie de operacións matemáticas puidemos abrir os armarios coa chave correspondente para atopar unha mensaxe secreta.

Visitas a biblioteca municipal Ágora

Estes días os grupos de 1º ESO visitaron a biblioteca municipal Ágora. O alumnado percorreu, da man de Eva Vieites e Nuria Rey, as diferentes salas de lectura e os espazos de ordenadores e reunións. Visitamos desde a sala dos máis pequenos ata a sala de adultos a que pode accederse a partir dos catorce anos.

No vindeiro mes de novembro a biblioteca terá dispoñible un bo número de xogos de mesa.

Por outro lado, o martes día 22, houbo un encontro do IES Agra do Orzán e do IES Plurilingüe Rafael Dieste, onde os docentes compartiron experiencias.

E ti, xa tes o carné de persoa usuaria da biblioteca Ágora?

Os marcapáxinas esquecidos

Non podedes imaxinar cantos marcapáxinas esquecidos atopamos nos libros…

Senón, atende ao que din os libros larapeteiros nestas viñetas do periodista e humorista arxentino Rep.

A vindeira semana, na biblioteca do IES Rafael Dieste e como celebración do Día das Bibliotecas, buscaremos  eses marcapáxinas aburridos e esquecidos polos lectores.

Mediante un xogo de pistas desvelaremos onde se atopan. 

Misterio na biblioteca

Desaparecen as letras dos libros...os ordenadores non funcionan…

Unha estraña bacteria esténdese pola biblioteca do IES Rafael Dieste… como podemos detela?

Ao longo da vindeira semana…celebramos o día das Bibliotecas cun scape room. 

Non poderás saír da biblioteca ata atopar o antídoto que salve os libros e os ordenadores… 

Que grupo conseguirá a solución?

Os días 23, 24 e 25 de outubro: scape room na biblioteca.

Novas bibliotecas de aula

Para a Hora de ler, cada alumno ou alumna pode traer o seu libro para ler. De todas maneiras hai organizadas xa unhas pequenas bibliotecas de aula. Os libros están seleccionados por idades e son de temáticas e xéneros variados tendo en conta a diversidade no grupo.

O alumnado axudante de biblioteca (2 por aula) será o encargado de manter en orde e con mimo esta pequena biblioteca de aula. Queremos evitar que os libros estean tirados nun recuncho ou espallados por andeis sen ton nin son.

En cada aula estará colocado un cartel moi visual cunha cita sobre a importancia de ler. Estes forman parte desta campaña desde a Biblioteca para fomentar o gusto pola lectura, por un lado, e coidar os espazos e a Hora de Ler, por outro.

Mimemos estes espazos, que sexan bonitos e coidados polo alumnado!

Comeza a Hora de ler

A hora de ler ten como obxectivo principal fomentar o gusto pola lectura entre os rapaces e rapazas. Está dirixida a todos os cursos de ESO.

Cada día dedicamos 20 minutos dunha sesión á lectura. 

• Na semana que comezou o 7 de outubro: 20 minutos na 1º sesión da mañá
• Na semana que comeza o 14 de outubro: 20 minutos na 2ª sesión da mañá
• Na semana que comeza o 21 de outubro: 20 minutos na 3ª sesión da mañá

E así ata a segunda semana de decembro na que faremos un parón por mor da proximidade da avaliación. Os calendarios están visibles en cada aula.

O alumnado axudante será o encargado de lembrar o horario cada día ou semana aos seus compañeiros e aos profes, por se nos esquecemos.

O docente pode decidir na súa clase como establecer a Hora de Ler: o comezo ou ao final da sesión, lectura individual en silencio, lectura en alto, dramatizacións etc.

Comeza o curso e… novo club de lectura

Nace un novo club de lectura!

Vai dirixido aos maiores.. nais, pais, profes e persoal do centro que queira apuntarse.

Neste primeiro curso a temática vai ser a novela negra.

Na cortiza da biblioteca tedes os títulos dos libros de lectura programados para este curso 24-25 así como as datas de reunión: o último martes de cada mes a partir das 18.15 h.

Animádevos a participar!!

Accede aquí á infografía en pdf.

Comeza o curso e… os Clubs de Encontros

Na cortiza xunto á biblioteca están anunciados os Clubs de Encontros que se desenvolverán este curso. Son clubs orientados tanto ao alumnado como profesorado e persoal do centro que teña interese en asistir durante un recreo á semana ou, no caso do Club de xadrez, un recreo cada quince días.

Os clubs son moi variados, ademais do de xadrez (que coordinará Jesús Escariz), volven o club de Lingua de signos (que levará Cristina Rubio, a nosa auxiliar de signos), os Encontros electrónicos (que levará Seila Vázquez), ademais do club de debate (levado por Arcadio González).

Na cortiza xunto á porta da biblioteca tedes un cartel para apuntarvos. Están pendentes os horarios que faremos en función das persoas que desexen asistir e das persoas que os impartirán.

Animádevos!!

Día das Letras Galegas: Luisa Villalta

Celebramos este día cunha exposición de deseños de portadas de libros de poemas da escritora.

Tamén convocamos a III edición do concurso de microrrelatos Palabras Mínimas.

Encontro de xadrez

O equipo de xadrez do instituto participou no encontro que tivo lugar no colexio Obradoiro o venres 24 de maio. Cada centro aportaba dous equipos de catro xogadores/as. E, unha vez máis, voltamos con trofeo: un terceiro posto acadado por Daniel Rey, Franco Gabriel Franco, Bruno Picos e Miguel Fernández. Parabéns a todas as persoas que participaron!!!

VIII Torneo Intercentros de Xadrez

Un curso máis participamos nesta convocatoria de xadrez. Nesta ocasión celebrouse no IES Fernando Wirtz. Os nosotros finalistas Franco Gabriel Franco e Xavi Lemus, na categoría junior, e Daniel Rey (Campión do Dieste 24), Bruno Picos e Miguel Fernández, en senior, xogaron e gozaron da xornada. E máis aínda, xa que volvamos co Primeiro Premio junior nas mans de Franco. Noraboa!!!